ڀڳوان کلناڻي

ڀڳوان کلناڻي ”ساقي“: شاعر، اديب، مصور، موسيقار ۽ فنڪار ڀڳوان کلناڻي ”ساقي“ جو جنم 3 نومبر 1921ع تي ڀريا، ضلعي نوشھري فيروز ۾ ٿيو. سندس تعلق ڪوڙي مل چندنمل کلناڻي جي خاندان سان هو. ابتدائي تعليم ڀريا مان حاصل ڪئي. ورهاڱي بعد ڀارت لڏي ويو، جتي مختلف اسڪولن ۾ استاد رهڻ کانپوءِ، جئه هند هاءِ اسڪول، پمپري، (پوني) مان هيڊماستر طور رٽائرڊ ٿيو. هندستان لڏي وڃڻ بعد مصوري کان ڪجهه عرصو پاسيرو رهيو، پر رٽائرڊ ٿيڻ کان پوءِ چترتڪاري/مصوري، ڪارٽونس ۽ گيت سنگيت سان ٻيھر جُڙيو. هن شروع ۾ ناول لکيا. بعد ۾ سنڌي ۽ اردوءَ ۾ شاعري ڪئي. سندس ڇپيل ڪتابن ۾: (1) ’ماسٽر جي‘ (ناول: 1950ع)، (2) ’راجو‘ (ناول: 1951ع)، (3) ’دلربايون‘ (شاعري: 1984ع)، (4) ’منھنجون آخري نادانيون‘ (شاعري: 1992ع)، (5) ’مستي پيريءَ جي‘ (شاعري)، (6) ’گستخايون‘ (شاعري)، (7) ’خاموشين سان ڳالهيون‘ (شاعري: 1997ع) ۽ هڪ انگريزي ڪتاب (Bubbles of Life (2 volumes شامل آهن. 8 مئي 2018ع تي پمپري، پوني (ڀارت) ۾ وفات ڪئي.

داخلا ۾ استعمال ٿيل تاريخون

2018.05.08  عيسوي

ڀڳوان کلناڻي 8 مئي 2018ع تي پمپري، پوني (ڀارت) ۾ وفات ڪئي.

1921.11.03  عيسوي

شاعر، اديب، مصور، موسيقار ۽ فنڪار ڀڳوان کلناڻي ”ساقي“ جو جنم 3 نومبر 1921ع تي ڀريا، ضلعي نوشھري فيروز ۾ ٿيو.

شاعر - ڀاڱي جون ٻِيون داخلائون